Այսօր՝ հուլիսի 22-ին, ողբերգական ավտովթար է տեղի ունեցել Արարատի մարզում։ Ժամը 01։00-ի սահմաններում Արարատի մարզի բնակիչ 33-ամյա Երվանդ Տ․-ն իր վարած Nissan Skyline մակնիշի ավտոմեքենայով Երևան-Երասխ ավտոճանապարհի 12-րդ կմ հատվածում մխրճվել է ճանապարհի աջակողմյան մասում կայանված Իրանի Իսլամական Հանրապետության քաղաքացի Հաբիբ Մ․-ին պատկանող Mercedes մակնիշի բեռնատարի կցորդիչի հետնամասի մեջ։
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Երվանդ Տ․-ն օպերատիվորեն դեպքի վայր ժամանած ՀՀ Ներքին գործերի նախարարության Փրկարար ծառայության թիվ 23 հրշեջ-փրկարարական ջոկատի հրշեջ-փրկարարների կողմից դուրս է բերվել ավտոմեքենայից և մոտեցվել օպերատիվորեն ժամանած «Արտաշատ» բժշկական կենտրոնի շտապօգնության ավտոմեքենային։
Հիվանդանոց են տեղափոխվել նաև Nissan-ի ուղևորներ՝ Արարատի մարզի բնակիչներ 27-ամյա Ղուկաս Ս.-ն, 33-ամյա Զորիկ Հ.-ն, 33 -ամյա Գևորգ Կ.-ն և 32-ամյա Մերուժան Հ.-ն։
Հիվանդանոց տեղափոխվելու ճանապարհին վարորդը գիտակցության չգալով՝ շտապօգնության ավտոմեքենայում մահացել է։
Վթարի փաստով՝ Արարատի մարզային քննչական վարչությունում նախաձեռնվել է քրեական վարույթ։
Քննիչ հանձնարարականով՝ ավտոմեքենաները տեղափոխվում են Ոստիկանության Արտաշատի բաժնի պահպանվող հատուկ տարածք։
Ավտոմեքենան այնպես էր մխրճվել բեռնատարի մեջ, որ փրկարարները, ոստիկաններն ու քաղաքացիները մեծ դժվարությամբ կարողացան այն դուրս բերել բեռնատարի տակից։
