MediaArm.am Շիրակի մարզի Բենիամին համայնքի բնակիչները բողոքում են, որ ջուր չունեն եւ բոլոր մշակաբույսերը արեւի տակ վառվել են:
«Կարտոֆիլը, լոբին, լրիվ վառվել են: Ընդհանրապես չեմ ջրել: Իբր խմելու ջուր ունենք, որ մի հատ էլ ոռոգման մասին մտածեմ»,-ասաց գյուղացի կանանցից մեկը, որի ձեռքին կարտոֆիլի վառված բույսն էր:
«Էս քաղել եմ, որ տանես Փաշինյանին ցույց տաս, որ վառում, եփում է: Բոստանը մշակել եմ, հիմա թափում եմ սաղ: Սրանից ի՞նչ բերք հանեմ: Ի՞նչ է լինելու մեր հալը: Մեռնեմ Փաշինյանին, լավ էլ ուրախ ընտրել եմ, գոնե մի քիչ ընդառաջի, որ կարողանանք մ,ենք էլ ապրենք: Մեղք ենք, խմելու ջուր չկա, լվացքի ջուր չկա, ոռոգման ջուր չկա: Կարտոլ չկա, ցորենն ու գարին կպել են գետնին: Անցած տարիներին էլի ուշացումով է եղել ջուրը, բայց եղել է, իսկ հիմա չկա»,-ասացին նրանք:
Մեկ այլ գյուղացի նկատեց, որ Կաղնուտի ջրամբարում ջուրն ամբարելու փոխարեն ԳԷՍ են աշխատացրել, քանի որ «էնտեղ փող է ֆռռում»:
Նշենք, որ այսօր Շիրակի մարզպետը ճանապարհը փակած գյուղացիներին խոստացել էր, որ ջուր է լինելու, բայց մինչեւ հիմա չկա. «Եթե չեղավ, գալու ենք Երեւան, դիմելու ենք վարչապետին: Բոլորս մի մարդու պես ամբողջ գյուղով պետք է գնանք կառավարություն: Մեզ այդ կառավարությունը պետք չի»,-ասաց բենիամինցի մի կին:
