MediaArm.am Երեկ Նիկոլ Փաշինյանը կառավարությունում ընդունել էր այս ընտրություններում ընդդիմադիրի քողի տակ իր համար աշխատած ուժերի ներկայացուցիչներին։ Հանդիպման բովանդակությունը ակնհայտ էր դարձնում, որ այս գործիչների ընտրությունների մասնակցելու միակ նպատակը եղել է օգնել Նիկոլ Փաշինյանին վերարտադրվել։
Հանդիպման եկած Սամվել Բաբայանն օրինակ վստահ էր, որ Հայաստանը մեծ հույսեր է կապում Նիկոլ Փաշինյանի հետ․ «Շնորհակալ եմ: Առաջին հերթին, բոլորիդ շնորհավորում եմ, Ձեր կուսակցությանը, որովհետև, իրոք, մեծ պատասխանատվության տակ եք մտել: Ապագան պետք է կառուցել, և Հայաստանը մեծ հույսեր է կապում ձեզ հետ, որ զարգացում ապահովենք, պաշտպանված լինենք»,-ասել էր Բաբայանը։
«Հանուն Հանրապետության» կուսակցության առաջնորդ Արման Բաբաջանյանը պատրաստակամություն էր հայտնել հետագայում ևս աջակցել Փաշինյանին․ «Պարոն վարչապետ, նախ թույլ տվեք շնորհավորել մեր երկրի այս ճակատագրական և բախտորոշ ժամանակահատվածում այսպիսի ազատ, արդար ընտրություններ կազմակերպելու, այս ընտրություններով մեր երկրում ժողովրդավարությունը և ժողովրդավարական գործընթացներն անշրջելի դարձնելու համար: Այս ընտրություններում Ձեր հաղթանակը անքննելի և անվիճելի է, և այս իմաստով ժողովրդի իշխանությունը պաշտպանելու գործում մենք անմնացորդ կերպով պատրաստ ենք սատար լինել Ձեր ձեռնարկումներին»:
«Շիրինյան-Բաբաջանյան» դաշինքի մյուս առաջնորդը Լևոն Շիրինյանը հրապարակային ընդունեց, որ իրենք այս պրոցեսին մանսակցել են հանուն Փաշինյանի վերարտադրության․ «Վերջին հաշվով, գրոհը կասեցվեց: Դա շատ կարևոր է, իմ գնահատականով, որտեղ մենք ունեցանք շատ էական դերակատարություն: Կարող եմ ասել, որ դաշինքն աշխատեց բացառիկ արդյունավետությամբ: Կարևոր էր հեղափոխության շարունակությունը, պետության կայունությունը և անկախության ամրապնդումը: Հիմա այսպես տեսակետները շատ եմ շարադրել, կշարունակեմ: Մենք այստեղ որևէ խնդիր չունենք, կլինենք ձեր կառավարության կողքին»։
«Հանրապետություն» կուսակցության ղեկավար Արամ Սարգսյանը Նիկոլ Փաշինյանի հաղթանակը համոզիչ գնահատեց, չխոսելով այն ընտրախախտումների մասին, որոնք արձանագրվել են այս ընթացքում․ «Շնորհավորում եմ շատ համոզիչ հաղթանակի համար, մաղթում եմ բեղմնավոր աշխատանք»:
«Արդար Հայաստան» կուսակցության ղեկավար Նորայր Նորիկյանը ևս ուրախ էր, որ Փաշինյանը հաղթել է, անգամ այն պարագայում, երբ իրենք պարտվել են․ «Շնորհակալ եմ, պարոն վարչապետ: Շնորհակալ եմ հրավերի համար: Ես, անկեղծ ասած, անկախ արդյունքներից, մեր նկատմամբ հանրության կողմից վստահությունից, թույլ տվեք ասել, որ կարևոր եմ համարում պատմական այս շրջափուլը Հայաստանի Հանրապետության Սահմանադրության 2-րդ հոդվածի համատեքսում՝ մեր ժողովրդի կողմից արտահայտված իրական տրամադրությունների առումով: Այնուամենայնիվ, շնորհավորում եմ մեր ժողովրդին և անձամբ Ձեզ»:
Հանդիպումների այս շարքը ակնհայտ է դարձնում, որ այս անձիք մոլորեցրել են իրենց ընտրողներին և ծառայել են Փաշինյանի վերարտադրության համար։ Նրանք իհարկե որպես պարգևատրում պաշտոններ կստանան, բայց պետք է այլևս մոռանանք քաղաքական գործընթացներին մասնակցելու և այդ գործընթացներում էական դեր ունենալու մասին։
