MediaArm.am Զաքիր Հասանովը Շուշիի գործողության ու Հուլուսի Աքարի՝ իրեն պատմածի մասին
Ադրբեջանական զինված ուժերի օրը [26.06.2021] Ադրբեջանի պաշտպանության նախարար Զաքիր Հասանովը պատմել է Շուշին վերցնելու գործողության մասին:
«Նախագահը [Իլհամ Ալիևը] Շուշիի գործողության կազմակերպման վերաբերյալ մի քանի լուրջ հանձնարարական տվեց։ Ուզում եմ ասել այդ հանձնարարականներից մեկի մասին. նախագահը հատուկ հանձնարարեց, որ գործողությունը ծրագրավորելիս և իրականացնելիս պետք է հաշվի առնել, որ Շուշին մեր մշակութային կենտրոնն է», - ադրբեջանական «Ռեալ» հեռուստաընկերությանը (Real TV) տված հարցազրույցում ասել է Հասանովը։
Ըստ նրա՝ ադրբեջանական կողմը Շուշիի ուղղությամբ հրետանի չի օգտագործել։ «Այսինքն՝ այստեղ մենք մի քանի դժվարություններ ունեինք՝ բաղկացած նրանից, որ նախևառաջ մենք չէինք կարող լրջորեն օգտագործել հրետանին: Ճիշտ է, Շուշիի մերձակայքում մենք հրետանիով ջախջախեցինք հայկական զորքերը, նրանք շատ մեծ կորուստներ ունեցան՝ թե՛ կենդանի ուժի, թե՛ տեխնիկայի առումով: Եթե նայեք համացանցում, տեսանելի է, թե ինչպես են նրանք ցրվել ճանապարհի ողջ երկայնքով. դա Լաչինի միջանցքն է: Հզոր հարված հասցվեց այնտեղ, որտեղ նրանք կենտրոնացած էին», - ասել է Արցախի դեմ սեպտեմբերի 27-ին ռազմական ագրեսիա սկսած պետության պաշտպանության նախարարը:
Զաքիր Հասանովը հիշեցրել է, որ գործողության օրը եղանակն ամպամած է եղել, և որ չէին կարող օգտագործել նաև ԱԹՍ-ներ։ «Եթե հիշում եք, այդ օրերին եղանակը ամպամած էր, ուստի Շուշիի գործողության մեջ մենք չէինք կարող օգտագործել անօդաչու թռչող սարքեր: Դժվարություններ կային նաև հետախուզական աշխատանքներ իրականացնելու հետ կապված: Մենք ոչ էլ օգտագործեցինք ինքնաթիռներ, ուղղաթիռներ», - նշել է նա:
Նրա խոսքերով՝ ռազմական գործողությունը ներառում էր ոչ միայն Շուշիի գրավումը. սկզբում դա վերաբերում էր շրջակայքին, իսկ հետո՝ հենց Շուշիին: «Ինժեներա-սակրավորային զորքերը կարճ ժամանակում անհավանական աշխատանք կատարեցին, հերոսություն ցուցաբերեցին: Կարճ ժամանակում ճանապարհը բացեցին: Այս ճանապարհը ցնցում դարձավ հայերի համար: Նրանք ակնկալում էին մեր հիմնական հարձակումը Շուշիի վրա այլ ուղղությամբ, իրենց ուժերը կենտրոնացրին այլ տեղում: Մեր ինժեներական զորքերի հերոս զինվորներն ու սպաները կարճ ժամանակում ճանապարհ բացեցին», - հավելել է Ադրբեջանի պաշտպանական գերատեսչության ղեկավարը։
Զաքիր Հասանովը նաև անդրադարձել է 44-օրյա պատերազմի ժամանակ Ադրբեջանին հսկայական աջակցություն ցուցաբերած Թուրքիայի պաշտպանության նախարար Հուլուսի Աքարին։ «Այստեղից ուզում եմ խոսել մեր հերոս հրետանավորների մասին: Նույնիսկ բարձրաստիճան, հարգված ռազմական մասնագետների մասին. չեմ թաքցնի, որ սա մի անձնավորություն է, որին ես շատ հարգում եմ՝ Թուրքիայի ազգային պաշտպանության նախարար Հուլուսի Աքարը: Նա աշխարհահռչակ ռազմական մասնագետ է: Պատերազմից հետո մենք նրան մի քանի կադր ցույց տվինք, ու նա ասաց. «Զաքիր փաշա՛, նա կրակում է, ինչպես ատրճանակից»: Այսինքն՝ խոսքը հարվածների բարձր ճշգրտության մասին է», - ասել է նախարարը:
«Եվ Շուշիի գործողությունը և ընդհանուր առմամբ Հայրենական պատերազմը, գերագույն գլխավոր հրամանատարի ղեկավարությամբ Ադրբեջանի գրավյալ տարածքների ազատագրումը ոսկե տառերով կգրվի Ադրբեջանի պատմության մեջ», - ընդգծել է Ադրբեջանի Պնախարարը:
Հիշեցնենք, որ Շուշին կորցնելու մասին հայկական կողմը հայտարարել էր նոյեմբերի 9-ին։ «Առ այսօր, ցավոք, պետք է խոստովանենք, որ անհաջողությունների շղթան դեռ մեզ ուղեկցում է, ու Շուշի քաղաքն ամբողջությամբ դուրս է մեր վերահսկողությունից, և այս մասին հուսադրող կամ ոգևորող բոլոր տեսակի քարոզչական թեզերը, բացի իրականության զգացողությունը կորցնելուց, մեզ ոչինչ չեն տալիս», - նոյեմբերի 9-ին ֆեյսբուքյան իր էջում գրել էր Արցախի նախագահի մամուլի խոսնակ Վահրամ Պողոսյանը։
Իսկ մինչ այդ Հայաստանի և Արցախի իշխանությունները 44-օր շարունակ ստում էին Արցախի պատերազմում հայկական կողմի իրական վիճակի մասին։
2020 թվականին սեպտեմբերի 27-ին Թուրքիայի աջակցությամբ խախտելով Մադրիդյան «ուժի չկիրառման» սկզբունքը՝ Ադրբեջանը հարձակվեց Արցախի վրա և 44-օրյա պատերազմի արդյունքներով օկուպացրեց նրա տարածքի զգալի մասը։
